ԵՊԲՀ. Մոլդովայում մեկնարկել է ՄԻՆԵՐՎԱ ծրագիրը

Մոլդովայի մայրաքաղաք Քիշնևում՝ Տնտեսագիտության ակադեմիայում մարտի սկզբին մեկնարկել է ՄԻՆԵՐՎԱ ծրագիրը, որը ֆինանսավորվել է Եվրամիության «Էրազմուս+» ծրագրով և նպատակ ունի հզորացնելու Մոլդովայի և Հայաստանի բուհերի հետազոտության կառավարումն ու գիտությունը դարձնելու առավել հասանելի ու մատչելի շահառուների լայն շրջանակի համար:  ԵՊԲՀ-ն Հայաստանի, Մոլդովայի, Սլովենիայի, Իտալիայի, Ֆրանսիայի, Բելգիայի և այլ երկրների 17 կրթական հաստատությունների հետ համատեղ կոնսորցիումի անդամ է:

Երկօրյա մեկնարկային գիտաժողովի ընթացքում կողմերը ներկայացրեցին իրենց երկրների և համապատասխան հաստատությունների հանրամատչելի գիտության փորձը: ԵՊԲՀ աշխատանքային խմբում ընդգրկված էին ֆարմակոլոգիայի ամբիոնի վարիչ, ծրագրի ԵՊԲՀ համակարգող Մարինե Բալասանյանը, գիտության վարչության գիտակազմակերպչական բաժնի պետ Մարիամ Գրիգորյանը և գիտական տեղեկատվություն և վերլուծության բաժնի պետ Լիլիթ Մարտիրոսյանը: Մեկնարկային գիտաժողովում Լիլիթ Մարտիրոսյանը ներկայացրեց «Հանրամատչելի գիտությունը ԵՊԲՀ-ում» թեմայով զեկույց: Միաժամանակ ընթացող կոնսորցիումի հանդիպման ընթացքում քննարկվեցին ծրագրի կառավարման խնդիրներն ու համագործակցող կողմերի պարտականություններն ըստ ծրագրի աշխատանքային փաթեթների:

Մեկնարկած ծրագրի մասին այլ մանրամասներ կներկայացվեն շուտով:

Հարցեր, պատասխաններ, մեկնաբանություններ